1Th 5 | BIG | STEP | Ini tonuwa kiling ngizi kumuli puwiliyegirik wok keya kazing Kilisi kozainumbekke yowekkerik nakko iniyegi pilik kozak yeiweki iniyegi lende miziweki mizagi langai ono.

1 Thessalonians 5

1 Ini tonuwa kiling ngizi kumuli puwiliyegirik wok keya kazing Kilisi kozainumbekke yowekkerik nakko iniyegi pilik kozak yeiweki iniyegi lende miziweki mizagi langai ono. 2 Ini makngezego pilik puragi iwaka panu. Wok yombanu nakkorau pilik mizagi ono mizabokko puwekke ngoweibek lewa pilik Yemizibek yogi. 3 Wok yongkambanu Yisuyegi ngizi kumuli onowiligu ei watabi mabiyeng weik wazono keya teni kulili ono kisi piyengke pura watabi kulili mizagi nayeng puwiliyegi nguk namizi lewagelagi logo puwili kuneng yanagi. Pura yongok mandik waziweki nguk namizi ngangang mizimolo kelik mabilik nguk namizi puwiliyegi wiriyagi. Pura lewagi logo puwili kazi kunagi ono. 4 Kapura ini teni kiling ngizi kumuli puwili ini kusabanurikkiwili ono, ini wilangkarikkiwili. Tegi ngoweibokko yongkambanuwiliyegi keleyi pilik wokpokko ini lebuk keya ngane keleyagi ono. 5 Teni mabuwili Anotogi wilangkarikkiwili. Teni mabuwili wok Yisu yogibokkowili. Teni kusabanurikkiwili ono teni kusabanurikki ngaibokkiwili ono. 6 Tegi teni yongkambanu Yisuyegi ngizi kumuli ono puwiligu iwek kola yolu pilik mizi nagani, kapura teni ngai yuke koyiweki keya yongkambanu kai na ono, wirere yoluwiliweki. 7 Yongkambanu iwek koli puwili kusaga iwek koli pura yawe puwiligira mizi keya yongkambanu kai ni puwili yawe puwiligira kusaga kai nagi pura mizi. 8 Kapura teni wok Yisu yogibokkowili legi teni wokpokki yuke keya ngai koyiweki. Teni Anotogi melezikke watabi mabiyeng maniweki keya teni yongkambanu nazuwagawiliyegi keliweki. Watabi piyeng amiwiligu melewangka ngelelengyengki wakiyi piyeng kelik wakiyiweki. Keya Kilisigu teni ngabelakpekka yaliya wazayagi puragi wilekpek keya ngai yukeweki. Pura amiwiligu kilulung ngayeng wakiyi piyeng kelik wakiyiweki. 9 Anotogo teni iza purik pugu mabuwiliyegi sisik pugura kubuli puwekke teni ngangang yaniweki iza ono kapura pugu teni Yemizi tonugubek Yisu Kilisigu teni Anotogi sisiktaga teni yaliya wazaya pura weiweki pugu iza. 10 Yisu Kilisi tenigi wiyeke kaile mizabek logo pi yo puwekke teni ibeng ma wik miza purik teni pi kiling menalege yoluweki. 11 Tegi wok mabiyeng nakko nakyegi kozang kelemi keya nakko nak watabi peyengki iwaka si keya yemane si kunibene kelemi mabek inugu mizageya mabilik.

12 Ini teni kiling ngizi kumuli puwiliyegi ne pelik kelegele keya nguk yei, inigi tepekke iniyegi ngai yawe mizi Yemizibokko kozang yani pulei kiling ini waligeleyi puwili keya iniyegi Anotogi ngago puraga miti yani puwiliyegi panga yungke kiliyizo. 13 Keya ini puwiliyegi yemanewili mizagiwili kani keya yawe puwiligiragi wiyeke puwiliyegi keli. Ini mabuwiligi yayeng wamenaraga pumokko menalege koyiweki.

14 Ini ne kiling ngizi kumuli puwili ne iniyegi pelik kozang yei, ini yawe mizagirikki kiyebuk sende mizi puwiliyegi yawe mizi yei keya kendek mizi puwili kozang keleyi keya ngizi kumulira kozang ono puwiliyegi saweli keya watabi mizagi nayeng mizi puwiliyegi yelakkelek keleyi. 15 Nakko nakyegi kaile mizarikki wiyeke nakko nakyegi kanga kelemi pani mizi nagani. Kapura wok mabiyeng nakko nakyegi wazono miziweki yawe kozang mizizo.

16 Ini wok mabiyeng wilik kagowingweki. 17 Ini wok mabiyeng waberek miziweki. 18 Ngenangaiyeng lewagela kele kapura wok mabiyeng Anotoyegi wazono mei, purik kozang ini Yisu Kilisigiwili legi pugu yana pulei kiling pilik mizi purik Anotogi kelira legi.

19 Anotogi Kung Walekpek inigi yungke yawe mizagirikka waliya wazami nagani. 20 Ngago Anotoyaga weiya logo kozak yei piyeng Anotoyagayeng logo piyeng sobozobo keremizi nagani. 21 Watabi mabiyeng wameik mane miza legi yang kelemi. Wameik piyengki kozang kebangkela. 22 Watabi kaile kaile piyeng mabiyengki kezanga mani.

23 Anoto teniyegi ya kuzige yanibokko ini nak nak kemenak kaile nayendau onoweki keleyibene ne waberek mizi. Keya pugu kung inuguwili, keya wilek kang inuguyeng, keya korik kang inuguyeng kaileyengka iza wara wizeibene ne waberek mizi logo tenigi Yemizibek Yisu Kilisi yo puwekke Anotogo ini kaile nayendau onowili keleyibene. 24 Anoto weiweki mena koli kaibok ngago pugura kebangkelara yolu wilibekpokko keya teniyegi keremareke mizi onobokko pilik mizagi.

25 Ini teni kiling ngizi kumuli puwili tonuwayegi waberek mizi.

26 Ini ngizi kumuli puwili nakko nakyegi kelira wilik kagowinda kiling melegulang mizi puraga walimizi mizizo. 27 Ne Yemizibekki yeiktaga ngago nara pelik kai, Kapiya perik pulogo teni kiling Yisuyegi ngizi kumuli mabuwiliyegi meizo.

28 Tenigi Yemizibek Yisu Kilisigi wazono pura ini kiling wizei pani.

Mabura.

Ne Paulu kapiya perik lende mizabek.